សារៈសំខាន់នៃជាតិកាល់ស្យូមដែលប៉ាម៉ាក់មិនគួរមើលរំលង!

អ្វីទៅជាកាល់ស្យូម?

កាល់ស្យូមជាជាតិរ៉ែសំខាន់មួយប្រភេទដែលជួយដល់ការលូតលាស់ និងទ្រទ្រង់សុខភាពឆ្អឹង។ បន្ថែមពីលើនេះ វាក៏ជួយឱ្យសរសៃប្រសាទ សាច់ដុំ និងបេះដូងមានសុខភាពល្អថែមទៀតផង។

ហេតុអ្វីក្មេងៗត្រូវការជីវជាតិប្រភេទនេះ?

ឱកាសក្នុងការជួយឱ្យឆ្អឹងលូតលាស់បានល្អមានត្រឹមតែម្ដងប៉ុណ្ណោះគឺក្នុងពេលវ័យកុមារ និងវ័យជំទង់។ កុមារដែលទទួលបានជាតិកាល់ស្យូមគ្រប់គ្រាន់ជួយការពារពួកគេពីបញ្ហាពុកឆ្អឹងក្នុងពេកអនាគត។ ទារក និងកុមារត្រូវការជាតិកាល់ស្យូម និងវីតាមីនឌីក្នុងការការពាររាងកាយពីបញ្ហាឆ្អឹងកោង។ ឆ្អឹងកោងអាចបង្កឱ្យក្មេងមានជើងខ្វេរ តឿ និងសាច់ដុំទន់ខុសពីធម្មតា។

កាល់ស្យូមសម្បូរនៅទីណា?

កាល់ស្យូមសម្បូរនៅក្នុងប្រភេទអាហារដូចជា៖

• ទឹកដោះគោ
• យ៉ាអ៊ួរ
• ឈីស
• ប្រូខូលី
• អាល់ម៉ុន គ្រាប់ល្ងរ
• ផ្លែក្រូច និងផ្លែព្រូនជាដើម។

បរិមាណកាល់ស្យូមដែលក្មេងគួរទទួលបាន

ខ្នាតរបស់កាល់ស្យូមគឺ មីលីក្រាម(mg)។ តម្រូវការនៃជាតិកាល់ស្យូមអាស្រ័យទៅតាមអាយុក្មេង៖

ទារក

ទារកអាចទទួលបានជាតិកាល់ស្យូមពីទឹកដោះម្ដាយ ឫ រូបមន្តម្សៅទឹកដោះ ៖

• ទារកអាយុក្រោម៦ខែត្រូវការជាតិកាល់ស្យូមប្រមាណជា 200 mg ក្នុងមួយថ្ងៃ
• ទារកអាយុចន្លោះពី៦ទៅ១១ខែត្រូវការជាតិកាល់ស្យូមប្រមាណជា 260 mg ក្នុងមួយថ្ងៃ

កុមារ និងវ័យជំទង់

វ័យកាន់តែកើនតម្រូវការនៃជាតិកាល់ស្យូមកាន់តែមានការកើនឡើង៖

• កុមារអាយុ១ទៅ៣ឆ្នាំ៖ ត្រូវការជាតិកាល់ស្យូមប្រមាណជា 700 mg ក្នុងមួយថ្ងៃ
• កុមារអាយុ៤ទៅ៨ឆ្នាំ៖ ត្រូវការជាតិកាល់ស្យូមប្រមាណជា 1000 mg ក្នុងមួយថ្ងៃ
• កុមារអាយុ៩ទៅ១៨ឆ្នាំ៖ ត្រូវការជាតិកាល់ស្យូមប្រមាណជា 1300 mg ក្នុងមួយថ្ងៃ

វីតាមីនឌី

វីតាមីនឌីមានសារៈសំខាន់ក្នុងការដឹកជញ្ជូនកាល់ស្យូមឱ្យរាងកាយប្រើប្រាស់។ គ្មានវត្តមានវីតាមីនឌី ជាតិកាល់ស្យូមពិបាកក្នុងការជ្រាបចូលឆ្អឹងនិងជួយឱ្យឆ្អឹងរឹងមាំ។ ទារក និងកុមារអាចទទួលបានវីតាមីនឌីពីក្នុង អាហារបំប៉ង រូបមន្តម្សៅទឹកដោះគោ និងពន្លឺព្រះអាទិត្យជាដើម។

ប្រភព៖kidshealth.org