សញ្ញានៃសុកពាំងមាត់ស្បូនដែលម៉ាក់ៗគួរដឹង

តើសុកពាំងមាត់ស្បូនជាអ្វី?

មុននឹងដឹងថា សុកពាំងមាត់ស្បូនជាអ្វី ម៉ាក់ៗគួរដឹងពីមុខងាររបស់សុកជាមុនសិន។ សុកជាសរីរាង្គថ្មីដែលត្រូវបានបង្កើតឡើងក្នុងពេលមានផ្ទៃពោះ និងភ្ជាប់ទៅជញ្ជាំងស្បូន។ វាជួយអោយទារកលូតលាស់បានល្អ និងមានមុខងារជាច្រើនរួមមាន

• ដឹកជញ្ជូនអុកស៊ីសែន គ្លុយកូស និងសារជាតិចិញ្ចឹមទៅអោយទារក
• រារាំងការជ្រាបចូលសារជាតិគ្រោះថ្នាក់ដល់ទារក
• បញ្ចេញចោលនូវឧស្ម័នកាបូនឌីអុកស៊ីត និងកាកសំណល់របស់ទារក
• សុកក៏ផលិតនូវអរម៉ូន estrogen, progesterone និង lactogen។ អរម៉ូនទាំងនេះជួយអោយដំណើរការនៃការមានផ្ទៃពោះមានសុខភាពល្អ និងជួយអោយរាងកាយស្ត្រីត្រៀមសម្រាប់ការសម្រាល និងបំបៅដោះកូន។
• វាក៏មាននាទីបញ្ជូនប្រព័ន្ធការពាររាងកាយទៅដល់ទារកដើម្បីប្រឆាំងនឹងជំងឺផ្សេងៗក្រោយពេលសម្រាល។
  ដោយសារសុកមាននាទីសំខាន់បែបនេះ ហេតុនេះហើយ ប្រសិនជាសុកមានបញ្ហាគឺវាអាចបណ្ដាលអោយមានគ្រោះថ្នាក់ដល់ទារកណាស់។ ទន្ទឹមនឹងនេះ សុកពាំងមាត់ស្បូនកើតមាន ០.៥ % ចំពោះស្ត្រីមានផ្ទៃពោះនៅត្រីមាសចុងក្រោយដែលបង្កជាគ្រោះថ្នាក់សម្រាប់ទារកក្នុងផ្ទៃ។

វាអាចមានទីតាំងនៅផ្នែកណាមួយនៃជញ្ជាំងស្បូន​តែមិនមែនស្ថិតនៅផ្នែកខាងក្រោមទេ។ វាមាន ៣ ករណី

• សុកស្ថិតនៃជ្រុងណាមួយនៃស្បួន តែមិនគ្របមាត់ស្បូនទេ
• សុកបាំងមាត់ស្បូនបន្តិចៗ
• សុកបាំងមាត់ស្បូនទាំងស្រុង

តើនរណាខ្លះដែលមានហានិភ័យជួបប្រទះបញ្ហានេះ?

ពុំទាន់មានការសិក្សាណាមួយបញ្ជាក់ពីមូលហេតុច្បាស់លាស់នៅឡើយទេ។ មានកត្តាមួយចំនួនដែលធ្វើអោយស្ត្រីប្រឈមនឹងបញ្ហានេះ ដូចជា

• ធ្លាប់មានបញ្ហាសុកពាំងមាត់ស្បូនពីមុនមក
• ស្ត្រីដែលធ្លាប់សម្រាលដោយវះកាត់ពីមុនមក ឬរំលូតជាច្រើនសារ
• ធ្លាប់វះកាត់ដុំនៅក្នុងស្បូនពីកន្លងមក
• មានកត្តាជាច្រើនទៀតដូចជា មានបុត្រក្នុងវ័យចំណាស់ អ្នកជក់បារី មានកូនភ្លោះ និងមានស្បូនខុសពីប្រក្រតី។

តើវាមានរោគសញ្ញាអ្វីខ្លះ?

ការធ្លាក់ឈាមនៅពាក់កណ្ដាលត្រីមាសទី ២គឺជាសញ្ញានៃសុកពាំងមាត់ស្បូន។ ម៉ាក់ៗខ្លះមានការធ្លាក់ឈាមនេះគឺមិនមានការឈឺចាប់ទេ តែម៉ាក់ៗខ្លះអាចចុកពោះ និងកន្ត្រាក់ស្បូនក៏មាន។

បញ្ហាសុកពាំងមាត់ស្បូនមិនអាចការពារបាននោះទេ។ បើសិនអ្នកមានការធ្លាក់ឈាមនៅត្រីមាសណាមួយនៃការមានផ្ទៃពោះត្រូវប្រញាប់ជួបជាមួយគ្រូពេទ្យ។ ក្នុងករណីនេះ ស្ត្រីគួរតាមដានការពិនិត្យអោយបានហ្មត់ចត់ដើម្បីដឹងពីការលូតលាស់របស់កូន និងដឹងពីទីតាំងនៃសុកថាត្រឹមត្រូវទេជៀសវៀងគ្រោះថ្នាក់នៃការធ្លាក់ឈាមខ្លាំងក្នុងពេលសម្រាល។

ប្រភព៖americanpregnancy.org