សញ្ញាទាំងនេះហើយ បញ្ជាក់ថាកូនអ្នកពុលចំណី

ពុលចំណីលើកុមារ ជាវិបត្តិដែលបណ្ដាលមកពីការញ៉ាំអាហារមិនស្អាតនិងមិនចម្អិនបានត្រឹមត្រូវ។

រោគសញ្ញា

រោគសញ្ញានៃការពុលចំណីរួមមាន៖

• ក្អួត
• រាក
• និងក្ដៅខ្លួន (ក្រោយញ៉ាំអាហារមិនស្អាត ១ ទៅ ២៤ ម៉ោង) ហើយរោគសញ្ញាទាំងនេះអាចបន្តរហូតដល់មួយទៅពីរថ្ងៃ។

ក្នុងករណីដែលកុមារពុលចំណីខ្លាំង វាអាចបណ្ដាលឱ្យកុមារប្រឈមនឹង ការបាត់បង់ជាតិទឹក និងអេឡិចត្រូលីត្រក្នុងកម្រិតខ្ពស់ ដែលបង្កជាហានិភ័យធ្ងន់ធ្ងរដល់សុខភាពក្មេង ។

ដំណោះស្រាយ៖

ក្នុងករណីកុមារពុលចំណីធ្ងន់ធ្ងរ សូមប្រញាប់នាំគាត់ទៅជួបគ្រូពេទ្យជំនាញជាបន្ទាន់។

ក្នុងករណីការពុលចំណីមានកម្រិតស្រាល៖

• ប្រើឱសថបំពេញជាតិទឹកនិងអេឡិចត្រូលីត្រ (Oral Rehydration) ឫ យើងស្គាល់ថាជាទឹកអូរ៉ាល់លីត្រ ទៅតាមការណែនាំរបស់គ្រូពេទ្យជំនាញ
• ម៉ាក់ប៉ាអាចផ្ដល់ឱសថប៉ារ៉ាសេតាម៉ុល ឫ អុីប៊ុយប្រូហ្វាន ដើម្បីកាត់បន្ថយការឈឺចាប់ និងបញ្ចុះកម្ដៅ ឫ អាចប្រើឱសថដទៃទៀតដែលគ្រូពេទ្យចេញវេជ្ជបញ្ជាឱ្យប្រើ។
• សូមកុំផ្ដល់ឱសថបំបាត់រាកដល់ក្មេង (over-the-counter diarrhea medicines) ដោយចិត្តឯង (សូមពិគ្រោះជាមួយពេទ្យជាមុនសិន សឹមធ្វើការផ្ដល់ជូនក្មេង)
• សូមកុំផ្ដល់ឱសថអាស្ពីរីនដល់ក្មេងក្រោម១៨ឆ្នាំដែលមានអាការៈក្ដៅខ្លួន ដែលវាអាចបង្កផលប៉ះពាល់ដល់ថ្លើម និងប៉ះពាល់ដល់អាយុជីវិត (Reye syndrome) ។

វិធីការពារកុមារពីការពុលចំណី

លោកប៉ាអ្នកម៉ាក់អាចការពារតាមរយៈ៖

• ឧស្សាហ៍លាងសម្អាតដៃកូនអ្នកជាមួយសាប៊ូ
• កុំផ្ដល់ទឹកដោះគោដែលនៅសល់យូរក្រោយក្មេងបៅរួច
• ឧស្សាហ៍សម្អាតបង្គន់ និងឧស្សាហ៍ប្ដូរខោទឹកនោមគាត់
• ទុកដាក់ និងលាងសម្អាតឱ្យបានត្រឹមត្រូវនូវចំណី ទឹកដោះម្ដាយ/គោ ឫ សម្ភារៈក្មេង
• ចម្អិនអាហារក្មេងឱ្យបានឆ្អិនល្អ
• កុំឱ្យក្មេងតូចៗញ៉ាំអាហារឆៅ ឫ ទឹកដោះគោដែលមិនបានសំលាប់មេរោគ ។

សូមប្រញាប់នាំក្មេងទៅជួបពិគ្រោះជាមួយគ្រូពេទ្យជាបន្ទាន់ក្នុងករណី៖

• ឈឺពោះខ្លាំងទៅៗ
• បន្តក្អួតជាប់រហូតក្រោយក្អួត២ម៉ោង
• ក្អួតម្ដងម្កាល នៅ២៤ម៉ោងក្រោយពុលចំណី
• រាកលើសពី៨ដង ក្នុងរយៈពេល៨ម៉ោង
• បន្តរាកស្រួចស្រាវលើសពី២៤ម៉ោង
• លាមក ឫ កម្អួតមានឈាម ឫ វត្ថុខ្មៅ
• លែងសូវចង់ញ៉ាំ
• ទឹកនោមប្តូរជាពណ៌ក្រម៉ៅ ឫ គ្មានទឹកនោមក្នុងរយៈពេល ៤ ទៅ ៦ម៉ោង
• យំគ្មានទឹកភ្នែក ភ្នែកខូង ឫ មាត់ស្ងួត
• ល្វើយខុសពីធម្មតា
• ឡើងកន្ទួលរមាស់
• រាកលើសពីមួយសប្ដាហ៍
• បន្តក្ដៅខ្លួន។

ប្រភព៖www.fairview.org