កូនឡើងពងបែកមាត់៖ ទាំងនេះជាអ្វីដែលលោកប៉ាអ្នកគួរធ្វើ

ពងបែកមាត់ ជាវិបត្តិមួយដែលធ្វើឱ្យក្មេងឈឺខ្លាំងក្នុងមាត់។ អ្នកអាចសម្គាល់ពងបែកមាត់តាមរយៈការមើលឃើញដុំពងទឹកពណ៌ក្រហម ឫ ស្នាមពណ៌ក្រហមលាយពណ៌សក្នុងមាត់ក្មេង។

ពងបែកមាត់ភាគច្រើនកើតលើអណ្ដាត កៀកអណ្ដាត និងផ្នែកខាងក្នុងនៃថ្ពាល់។ ភាគច្រើន ពងបែកមាត់នេះធ្វើឱ្យក្មេងមានការឈឺចុកចាប់ខ្លាំង ដែលធ្វើឱ្យក្មេងពិបាកនិយាយ ទំពារ និងផឹកទឹក។

ពងបែកមាត់ភាគច្រើនបង្កដោយ៖

• របួស ឫ ការកកិតក្នុងមាត់អំឡុងពេលដុសសម្អាតធ្មេញ ឫ ការធ្វើធ្មេញ
• ក្មេងខាំអណ្ដាត ឫ ផ្ទៃខាងក្នុងនៃថ្ពាល់
• ការឆ្លងមេរោគ
• បង្កដោយអាហារមួយចំនួន និងការតានតឹងអារម្មណ៍ជាដើម
• ពងបែកប្រភេទនេះមិនចម្លងទៅកាន់អ្នកដទៃឡើយ
• វានឹងធូរស្បើយក្នុងរយៈពេលមួយសប្ដាហ៍ក្រោយ។

វិធីថែទាំកុមារដែលមានវិបត្តិពងបែកមាត់

• ញ៉ាំទឹកត្រជាក់ឱ្យបានច្រើន អ្នកអាចប្រើទុយោជាមួយកុមារដើម្បីកាត់បន្ថយការកកិតជាមួយពងបែកមាត់នោះ
• ផ្ដល់អាហារទន់ៗ សាបៗ ដែលងាយស្រួលក្នុងការទំពារនិងមិនធ្វើឱ្យក្រហាយមាត់
• កាត់អាហារជាចំណិតតូចៗដែលជួយឱ្យក្មេងងាយស្រួលទំពារ និងលេប
• បញ្ចៀសអាហារដូចជា សូកូឡា អាហារហឹរ អាហារប្រៃ អាហារជូរ គ្រាប់ធញ្ញជាតិ ជាដើម
• ស្អំទឹកកកលើកន្លែងដែលមានដំបៅ
• ផ្ដល់នូវឱសថបំបាត់ការឈឺចាប់ដូចជាប៉ារ៉ាសេតាម៉ុល ឫ អុីប៊ុប្រូហ្វែន
• ជ្រើសរើសច្រាស់ដុសធ្មេញដែលមានសរសៃទន់
• សាកសួរគ្រូពេទ្យសិន មុនផ្ដល់ថ្នាំលាបបំបាត់ពងបែកមាត់។

ប្រភព៖myhealth.alberta.ca