នៅពេលកុមារផ្ដាសាយ តើគួរផ្ដល់អាហារូបត្ថម្ភ និងការថែទាំយ៉ាងដូចម្ដេច?

ជំងឺផ្ដាសាយលើកុមារក៏មិនខុសពីមនុស្សពេញវ័យដែរ វាជាជំងឺលើផ្លូវដង្ហើមមួយប្រភេទដែលឆ្លងរាលដាលតាមរយៈមេរោគវីរុសប្រមាណជា២០០ប្រភេទជាង។ ផ្ដាសាយធំពីរៗ ដែលយើងឱស្សាហ៍ជួបប្រទះជាងគេនោះគឺ ផ្ដាសាយធម្មតា និងគ្រុនផ្ដាសាយធំ (បង្កដោយមេរោគវីរុសខុសគ្នា)។

ចឹងបើយើងក្រឡេកពីភាពខុសគ្នានៃជំងឺផ្ដាសាយទាំងពីរ ផ្ដាសាយធំ ផ្ដើមពីអាការៈ ក្ដៅ រងារ ញាក់ (38^oC ឡើង) ក្អក ឈឺក ឈឺក្បាល តឹងច្រមុះ និងអស់កំលាំងខ្លាំង។

រីឯ ជំងឺផ្ដាសាយធម្មតាមានសញ្ញាស្រាលជាងនេះ ហើយភាគច្រើនផ្ដើមចេញពីអាការៈតឹងច្រមុះ ហៀរសំបោរ និងមិនសូវក្ដៅសម្រុកដូចគ្រុនផ្ដាសាយធំទេ។

ជំងឺផ្ដាសាយមានរោគសញ្ញាយ៉ាងដូចម្ដេចខ្លះ? រោគសញ្ញាផ្ដាសាយអាចមានភាពខុសគ្នាបន្ដិចបន្ដួចពីក្មេងម្នាក់ទៅក្មេងម្នាក់ទៀត ឫ ពីប្រភេទផ្ដាសាយមួយទៅមួយប្រភេទទៀត។ អ្នកអាចសង្កេតរោគសញ្ញានៃជំងឺផ្ដាសាយតាមរយៈ៖

• តឹងច្រមុះ ហៀរសំបោរ កណ្ដាស់
• ឈឺក ក្អក ឈឺក្បាល ពេលខ្លះអាចក្ដៅខ្លួន
• ឈឺភ្នែក ឫ ភ្នែកឡើងក្រហម
• ហើមកូនកណ្ដុរ (អាចស្ទាបម្ដុំកញ្ចឹងក)
• ពេលខ្លះអាចបាត់ចំណង់អាហារ មានអារម្មណ៍អត់ស្រួលខ្លួន ឫ អាចក្អួត
• ឈឺសន្លាក់សាច់ដុំ ឈឺត្រចៀក និងមួរម៉ៅច្រើន។

របបអាហារមានទំនាក់ទំនងនឹងជំងឺផ្ដាសាយលើទារក និងកុមារដែរ ឫ ទេ?

របបអាហារដែលគាត់ញ៉ាំចូលទៅ អាចមានទំនាក់ទំនងនឹងជំងឺផ្ដាសាយលើទារក និងកុមារ ព្រោះអាហារខ្លះញ៉ាំទៅធ្វើឱ្យគាត់ឆាប់ធូរស្បើយពីជំងឺផ្ដាសាយ ឯអាហារខ្លះទៀតជម្រុញឱ្យជំងឺកាន់តែមានរយៈពេលយូរ ឫ ធ្ងន់ធ្ងរជាងមុន។ ពពួកអាហារដែលជំរុញឱ្យក្មេងឆាប់ជាសះស្បើយពីជំងឺផ្ដាសាយជាពពួកអាហារដែលសំបូរដោយ វីតាមីន A, C, E និងជាតិរ៉ែដូចជា Iodine, Zinc, Selenium ជាដើម។

អាហារសម្រាប់ក្មេងដែលកើតមាននូវជំងឺផ្តាសាយ មានដូចជា៖

• បើគាត់ក្រោម៦ខែ ឱ្យគាត់បៅទឹកដោះម្ដាយឱ្យបានគ្រប់គ្រាន់ (វាផ្ដល់នូវជីវជាតិគ្រប់គ្រាន់)
• ញ៉ាំអាហារឱ្យបានសមស្រប៖ ញ៉ាំអាហារដែលសំបូរដោយបន្លែ ផ្លែឈើ ដូចជា ក្រូច ចេក ស្ត្រប៊ីរី ការ៉ុត ដំឡូង ប៉េងបោះ ដោយវាសំបូរជាតិវីតាមីនស៊ី អុី និងជាតិរ៉ែដទៃទៀតដែលជួយដល់ប្រព័ន្ធការពាររាងកាយ និងជួយឱ្យក្មេងឆាប់ជាសះស្បើយ
• ទឹកសណ្តែក ទឹកផ្លែឈើ៖ ក្មេងដែលកើតផ្តាសាយតែងធុញទ្រាន់អាហារ។ ដូច្នេះ ក្រៅពីស៊ុប គួរឱ្យកូនផឹកទឹកសណ្តែក ទឹកសម្ល ទឹកផ្លែឈើឱ្យច្រើន ដើម្បីកុំឱ្យសម្បោរខាប់ស្អិត  និងជួយឱ្យក្មេងស្រស់ស្រាយបាន
• ផឹកទឹកឱ្យច្រើន៖ គួរជាទឹកក្តៅអុណ្ឌៗ ជួយសម្រួលដល់បំពង់ក ជួយស្រូបចំហាយចូលតាមច្រមុះ កាត់បន្ថយការតឹងច្រមុះ។ ពុំគួរផឹកទឹកត្រជាក់ទេ ព្រោះធាតុត្រជាក់នឹងធ្វើឱ្យប្រព័ន្ធការពាររបស់រាងកាយថយចុះ និងបង្កើនស្លេស្ម។
• ស៊ុបមាន់៖ ស៊ុបក្ដៅអុណ្ឌៗ សំបូរដោយជីវជាតិគ្រប់គ្រាន់ នៅពេលក្មេងញ៉ាំចូលទៅ ជួយឱ្យគាត់ដកដង្ហើមស្រួល កាត់បន្ថយការតឹងច្រមុះ និងជួយប្រឆាំងការរលាកដែរ ដែលធ្វើឱ្យឆាប់ធូរស្បើយពីផ្ដាសាយ លើសពីនេះវាក៏ជួយបំពេញជាតិទឹកថែមទៀតផង។

ប្រភព៖raisingchildren.net.auwww.childrenshospital.orgwww.doliprane.com.kh