គុណប្រយោជន៍នៃការផ្ដល់អាហារបន្ថែមលើទារកអាយុ 6 ខែឡើង

ឈានចូលដល់វ័យ៦ខែ ជាពេលវេលាមួយដែ​លអាណាព្យាបាលត្រូវចាប់ផ្ដើមបន្ស៊ាំនូវការផ្ដល់អាហារបន្ថែមពីលើទឹកដោះម្ដាយ ព្រោះទឹកដោះម្ដាយមិនអាចបំពេញនូវតម្រូវការអាហាររូបត្ថម្ភសំខាន់ៗ បានគ្រប់គ្រាន់ដល់ទារកនៅអាយុ៦ខែឡើងឡើយ ដែលដូចនេះហើយទើបគេណែនាំឱ្យអាណាព្យាបាលធ្វើការផ្ដល់នូវអាហារបន្ថែមដល់ទារក នៅវ័យ៦ខែឡើង។

តាមការកំណត់របស់អង្គការសុខភាពពិភពលោក អាហារបន្ថែមគឺជាអាហារដែលមានលក្ខណៈ រឹង ឫ​ ខាប់ជាងទឹកដោះម្ដាយ និងត្រូវបានផ្ដល់ជាចម្បងពីលើទឹកដោះម្ដាយ ព្រោះទឹកដោះម្ដាយមិនអាចផ្ដល់នូវសារជាតិចិញ្ចឹម គ្រប់គ្រាន់ដល់ទារកឡើយ ពិសេសលើ ជាតិស័ង្កសី ជាតិដែក និងថាមពលជាដើម ដែលជាហេតុតម្រូវឱ្យអាណាព្យាបាល គួរងាកមកធ្វើការផ្ដល់អាហារបន្ថែមជូនពួកគាត់។ ទោះជាយ៉ាងណា ទឹកដោះម្ដាយនៅតែមានសារជាតិចិញ្ចឹមសំខាន់ៗសម្រាប់ការរីកលូតលាស់របស់ទារក​ និងកុមារ ដូច្នេះហើយម៉ាក់ៗគួរបន្តបំបៅក្មេងរហូតដល់អាយុពីរឆ្នាំ ឫ លើស។

សារៈសំខាន់នៃការផ្ដល់អាហារបន្ថែមបានទាន់ពេលវេលានៅវ័យ 6 ខែនេះ គឺជួយកាត់បន្ថយការប្រឈម៖

• ជំងឺស្លេកស្លាំង
• ការពារនូវកង្វះជាតិដែក ជាតិសង្ក័សី និង កង្វះអាហារូបត្ថម្ភផ្សេងទៀត
• ហើយវាក៏ជួយដល់ការលូតលាស់បានត្រឹមត្រូវនូវផ្នែកបញ្ញា និងស្មារតីរបស់ក្មេង។

នៅប្រទេសកម្ពុជាយើង ជាទូទៅ អាហារបន្ថែមសំដៅជាចម្បងលើបបរខាប់គ្រប់គ្រឿង ហើយវាក៏អាចជា បន្លែ ឫ ផ្លែឈើដែលយើងកិនរួច​ ឫ បបរកំប៉ុង ជាដើម។ អាហារបន្ថែមគួរតែជាអាហារចម្រុះមុខដែលស្ថិតនៅក្នុងអាហារទាំងបីក្រុម ដូចជា អាហារថាមពល ដែលជួយឱ្យទារក និងកុមារមានថាមពលច្រើន និងមានដូចជា បបរ គុយទាវ បាយ​ មី ដំឡូង ប្រេងឆា។ល។ ទីពីរគឺអាហារសាងសង់ដែលមានដូចជា ត្រី សាច់ ស៊ុត ថ្លើម សណ្ដែកសៀង តៅហ៊ូរ -ល- ដែលជួយឱ្យរាងកាយកុមារលូតលាស់ និងរឹងមាំ។ ចុងក្រោយគឺអាហារការពារ ដែលមានដូចជា បន្លែ ផ្លែឈើ ដែលវាដំណើរការជាមួយអាហារថាមពល និងអាហារសាងសង់ ជួយឱ្យក្មេងលូតលាស់ និងការពារក្មេងពីជំងឺផ្សេងៗ។

ការផ្ដល់អាហារបន្ថែមមុនអាយុ៦ខែងាយធ្វើឱ្យក្មេង ស្លាក់អាហារ មិនទទួលបានថាមពល ឫ មិនទទួលបានអាហារូបត្ថម្ភត្រឹមត្រូវ និងងាយប្រឈមនឹងជំងឺធាត់។ រីឯការផ្ដល់អាហារបន្ថែមយឺតពេក (ក្រោយ៦ខែ)​ ទារកងាយប្រឈមនឹងការលូតលាស់យឺត កង្វះជាតិដែក និងមិនចូលចិត្តញ៉ាំអាហារបន្ថែម។

មូលហេតុដែលអ្នកជំនាញណែនាំឱ្យទារកញ៉ាំអាហារបន្ថែមនូវវ័យ៦ខែនេះ ព្រោះប្រព័ន្ធរំលាយអាហារ និងប្រព័ន្ធការពាររាងកាយក្មេងមានសភាពរឹងមាំជាងមុន ដែលអាចទប់ទល់នឹងអាហារដែលងាយបង្កអាឡែកហ្ស៊ី (ស៊ុត សណ្ដែក…) មិនធ្វើឱ្យក្មេងងាយប្រឈមនឹងជំងឺរាគរូស និង ជំងឺឆ្លងផ្សេងៗទៀត។

ប្រភព៖who.intcamnut.weebly.com