គន្លឹះថែទាំការរោលខោទឹកនោមលើទារក និងកុមារ

អ្វីទៅជាការរោលខោទឹកនោម?

ការរោលខោទឹកនោមជាការឡើងក្រហមលើស្បែកគូថ និងតំបន់អវៈយវៈភេទរបស់ទារក  តែជាសំណាងល្អវាមានភាពងាយស្រួលក្នុងការព្យាបាល។

រោគសញ្ញានៃការរោលខោទឹកនោម

• ឡើងផ្ទាំងពណ៌ក្រហមលើស្បែកគូថ កំភ្លៅ និងតំបន់អវៈយវៈភេទ
• ជួនកាលឡើងជាស្នាមក្រហមតូចៗ ឫ កន្ទួលរមាស់
• យំ រករឿង មួរម៉ៅ ពេលអ្នកប៉ះ ឫ សម្អាតតំបន់រោលនោះ
• ក្នុងករណីធ្ងន់ធ្ងរ វាអាចឡើងជាដុំពងទឹក (blisters) ឫ ឡើងផ្ទាំងក្ដាំងពណ៌ក្រហម (pimples)
• ប្រសិនជាការរោលនេះមានការឆ្លងមេរោគ វាអាចធ្វើឱ្យស្បែកទារកឡើងក្រហមព្រឿងៗ និងហើម
• អាចឆ្លងទៅតំបន់ផ្សេងៗក្រៅពីតំបន់ខោទឹកនោម។

មូលហេតុបង្កឱ្យទារករោលខោទឹកនោម

• លាមក និងទឹកនោម៖ ខានប្ដូរខោទឹកនោមទារកយូរម៉ោង (មានផ្ទុកលាមក និងទឹកនោមប៉ះស្បែកយូរ) អាចធ្វើឱ្យស្បែកទារកងាយឡើងរោល។ ការជុះឫ រាកញឹកញាប់ក៏អាចធ្វើឱ្យស្បែកទារកឡើងរោលដែរ
• ការកកិត៖ ស្បែកកកិតជាមួយខោទឹកនោមយូរ (ពិសេសស្លៀកខោរលុងពេក ឫ តឹងពេក)អាចធ្វើឱ្យស្បែកទារកងាយរោល
• ឆ្លងមេរោគផ្សិត៖ មេរោគផ្សិតលូតលាស់លឿននៅកន្លែងមានសំណើម និងក្ដៅឧណ្ហៗ ដែលតំបន់ស្លៀកខោទឹកនោមជាតំបន់ងាយឆ្លងមេរោគផ្សិតនេះ
• អាលែកហ្ស៊ី៖ សាប៊ូដុំ សាប៊ូបោកខោអាវ ទឹកក្រអូប​ ខោទឹកនោមបោកបាន កន្សែងជូតទារក ឫ ឡេលាបខ្លួន សុទ្ធតែអាចធ្វើឱ្យស្បែកទារកអាលែកហ្ស៊ី។ តាមដានស្បែកទារកឱ្យបានជាប់លាប់។ បញ្ឈប់ការប្រើប្រាស់ផលិតផលណាដែលបង្កឱ្យស្បែកទារកឡើងរោល
• អាហារថ្មីៗ៖ ការផ្លាស់ប្ដូររបបអាហារទារក និងកុមារអាចធ្វើឱ្យមានការផ្លាស់ប្ដូរលើការជុះរបស់ក្មេង។ សូមតាមដានលើការផ្ដល់អាហារ ករណីញ៉ាំអាហាររួច ធ្វើឱ្យស្បែកតំបន់គូថទារកឡើងរោល សូមបញ្ឈប់ការផ្ដល់អាហារប្រភេទនោះ។ ស្បែកទារកបៅទឹកដោះម្ដាយក៏អាចរោលជាមួយអាហារណាមួយដែលម្ដាយញ៉ាំចូលទៅដែរ។

អ្នកអាចការពារទារកកុំឱ្យរោលខោទឹកនោមបានទេ?

ពិតណាស់! អ្នកអាចការពារនិងកាត់បន្ថយទារក កុំឱ្យមានបញ្ហារោលខោទឹកនោមបាន៖

1. តាមដានខោទឹកនោមទារកជាប្រចាំ ករណីខោទឹកនោមឡើងសើម ឫ មានលាមកសូមធ្វើការផ្លាស់ប្ដូរ
2. ទុកពេលឱ្យស្បែកទារកស្ងួតសិន សឹមធ្វើការផ្លាស់ប្ដូរខោទឹកនោម

3.ជ្រើសរើសខោទឹកនោមដែលរលុងបន្តិច ដើម្បីឱ្យមានខ្យល់ចេញចូលតំបន់ស្បែកគូថទារក

4.លាងសម្អាតដៃមុន និងក្រោយផ្លាស់ប្ដូរខោទឹកនោម ដើម្បីការពារការឆ្លងមេរោគលើស្បែក

5.ទារកមួយចំនួនងាយឡើងរោល អ្នកអាចលាបគ្រីមដើម្បីការពារការរោលខោទឹកនោមនេះ។ ជ្រើសរើសផលិតផលការពាររោលដែលមានជាតិ Zinc Oxide ឫ petroleum​ ដែលសាកសមជាមួយស្បែកទារក

6.បញ្ចៀសការប្រើម្សៅលាបលើស្បែក ដែលវាអាចធ្វើឱ្យប៉ះពាល់ដល់សួតទារក

7.បញ្ចៀសការប្រើកន្សែងសើមដែលមានជាតិអាល់កុល(alcohol) ឫ ជាតិក្លិន(fragrance)ដែលធ្វើឱ្យប៉ះពាល់ដល់ស្បែកទារក

8.ជូតសម្អាតស្បែកទារកជាមួយទឹកក្ដៅឧណ្ហៗ ឫ សាប៊ូក្មេង

9.ផ្អាកស្លៀកខោទឹកនោមឱ្យទារកមួយរយៈ ដើម្បីឱ្យស្បែកមានឱកាសស្ងួត និងប៉ះខ្យល់

10.លាបឡេព្យាបាលរោលស្បែកមុនស្លៀកខោទឹកនោមថ្មី

11.កុំប្រើឡេ ឫ គ្រីមដែលមានជា boric acid, camphor, phenol, methyl salicylate ឫពពួក benzoin tincture សារជាតិគីមីទាំងនេះអាចប៉ះពាល់ដល់ស្បែកក្មេង

12.ប្រសិនជារោលខោទឹកនោមបង្កដោយមេរោគផ្សិត សូមនាំទារកទៅជួបជាមួយគ្រូពេទ្យជំនាញជាបន្ទាន់។

ប្រភព៖familydoctor.org