កូនតូចបត់ជើងធំរាងទឹកៗ អាចមានបញ្ហាអ្វីទេ?

ប្រសិនជាទារកជុះញឹកញាប់ជាងធម្មតា ហើយលាមកទឹកៗខុសពីធម្មតា ទារកអាចនឹងមានបញ្ហារាករូស។

មានមូលហេតុជាច្រើនបង្កឱ្យទារករាករូស ដែលភាគច្រើនបង្កដោយ៖

វីរុស៖ ភាគច្រើនបង្កដោយវីរុសឈ្មោះ Rotavirus (អាចការពារវីរុសប្រភេទនេះតាមរយៈការបន្តក់វ៉ាក់សាំងការពារមេរោគ Rotavirus)
បាក់តេរី៖ ដូចជា Salmonella, Campylobacter or Shigella សុទ្ធតែជាមេរោគបង្កឱ្យក្មេងរាករូស
ញ៉ាំទឹកផ្លែឈើ ឫ ភេសជ្ជៈផ្អែមច្រើនពេក
កង្វះអនាម័យ
វិបត្តិជាតិស្ករឡាក់តូស (Lactose Intolerance)៖ ធ្វើឱ្យក្មេងរាក ឈឺពោះ ហើមពោះជាដើម។ ក្នុងករណីក្មេងទើបតែជាសះស្បើយពីរលាកពោះវៀនហើយនៅតែបន្ដរាក វាបណ្ដាលមកពីវិបត្តិ Lactose Intolerance។ គ្រូពេទ្យអាចនឹងណែនាំឱ្យប្រើទឹកដោះគោបំបាត់រាក (Lactose-free milk) មួយរយៈសិន។ សូមកុំបារម្ភ វិបត្តិនេះនឹងបាត់ទៅវិញនៅប៉ុន្មានថ្ងៃ ឫ ប៉ុន្មានសប្ដាហ៍ក្រោយ ដែលក្រោយពេលគាត់ជាសះស្បើយគាត់អាចញ៉ាំទឹកដោះម្ដាយ ឫ ទឹកដោះគោធម្មតាបាន។

ក្នុងករណីដែលក្មេងរាកដោយសារមេរោគ វាអាចបង្កឱ្យក្មេងមានអាការៈផ្សេងទៀតដូចជា ក្ដៅខ្លួន ឈឺពោះ មិនសូវញ៉ាំឫបៅ និងក្អួតជាដើម។ ជាទូទៅការរាកអាចមានរយៈពេល២ទៅ៤ថ្ងៃ ឫ បន្តរហូតដល់២សប្ដាហ៍ក៏អាចថាបាន។

លោកប៉ាអ្នកម៉ាក់អាចធ្វើអ្វីបាន?

ផ្ដល់ជាតិទឹកឱ្យបានគ្រប់គ្រាន់។ រាកអាចធ្វើឱ្យក្មេងបាត់បង់ជាតិទឹកពីក្នុងរាងកាយ ដែលវាបណ្ដាលមកពីទារកមិនញ៉ាំទឹកនិងអេឡិចត្រូលីត្របានគ្រប់គ្រាន់ ដើម្បីទៅបង្គ្រប់ការបាត់បង់ជាតិទឹកដោយសារការរាកនិងក្អួត សូមបន្តផ្ដល់ទឹកដោះ ឫ ជាតិទឹកដល់ទារកឱ្យបានគ្រប់គ្រាន។

គ្រូពេទ្យអាចនឹងចេញវេជ្ជបញ្ជាឱ្យប្រើទឹកអូរ៉ាលីត្រដើម្បីទៅបំពេញជាតិទឹក និងជាតិអេឡិចត្រូលីត្រដែលបាត់បង់នោះ និង/ឫ អមជាមួយការប្រើប្រាស់ឱសថបំបាត់រាក។

សូមកុំឱ្យថ្នាំបំបាត់រាកដល់ទារកដោយចិត្តឯង។

ពេលណាគួរប្រញាប់នាំទារកទៅជួបគ្រូពេទ្យជំនាញ?

ក្នុងករណីដែលក្មេងលេចឡើងនូវរោគសញ្ញាទាំងនេះ សូមប្រញាប់នាំក្មេងទៅជួបគ្រូពេទ្យជាបន្ទាន់៖

មានសញ្ញាបាត់បង់ជាតិទឹកក្នុងរាងកាយ

- - - ស្ងួតស្បែក ស្ងួតមាត់ និងអណ្ដាត
    - មិនសូវនោម
    - យំគ្មានទឹកភ្នែក
    - បង្ហើយក្បាលក្មេងឡើងទន់ខុសធម្មតា

សញ្ញារាកធ្ងន់ធ្ងរ

- - - ក្អួតចេញពណ៌បៃតង
    - លាមកសុទ្ធតែសម្បោរ ឫ ឈាម
    - ឈឺចុកពោះខ្លាំង
    - ហើមពោះ
    - ត្រជាក់ដៃជើង បែកញើសខុសធម្មតា
    - ដកដង្ហើមញាប់ខុសធម្មតា ឫ ពិបាកដកដង្ហើម
    - ក្ដៅខ្លួន (លើសពី 38 អង្សារសេឡើង)
    - ល្ហិតល្ហៃ ឫ មិនព្រមក្រោក។