សង្រ្គោះបឋមលើទារក និងកុមារ ៖ ការធ្វើចលនាបេះដូង និងដង្ហើម

គ្មាននរណាម្នាក់អាចទស្សន៍ទាយបានទេថា នឹងមានហេតុការណ៍អ្វីកើតឡើងក្នុងពេលអនាគត? ពិសេសរដូវនេះ ជារដូវវស្សា ទឹកជន់ ស្ទើរតែគ្រប់ខេត្តក្រុង។ ដែលហេតុផលនេះហើយ អាណាព្យាបាលគួរដឹងពីវិធីសង្រ្គោះបឋម ដូចជាការធ្វើចលនាបេះដូង និងដង្ហើម ជាដើម ដោយវាអាចជួយសង្រ្គោះអាយុជីវិតជាច្រើន ដែលផ្ទុយពីជំនឿមួយចំនួនលើការជួយសង្រ្គោះមិនត្រឹមត្រូវ ដែលខុសពីក្បួនវេជ្ជសាស្ត្រមួយចំនួន ដូចជា ការខាំកែងជើង ហក់រំលងរាងកាយជនរងគ្រោះ និងទ្រគោះ លើកបោះក្មេងលង់ទឹកជាដើម។

នៅពេលដែលក្មេងមិនដឹងខ្លួន (បណ្ដាលពីហេតុការណ៍ណាមួយ)

ប្រសិនជាហេតុការណ៍អាក្រក់ណាមួយកើតឡើង ដែលធ្វើឱ្យទារក និងកុមារ មិនដឹងខ្លួន សូមប្រញាប់ធ្វើចលនាដង្ហើម និងកុំស្លន់ស្លោរ ពិសេសកុំភ្លេចខលហៅឡានសង្រ្គោះបន្ទាន់។

ចាប់ផ្ដើម ឆែកលើរាងកាយក្មេង ពិសេសក្នុងមាត់ និងផ្លូវដង្ហើមរបស់គេ ថាមានអ្វីដែលធ្វើឱ្យស្ទះខ្យល់ដែរ ឫ ទេ។ បើមាន សូមប្រញាប់ដកវាចេញដោយប្រុងប្រយ័ត្ន។

ទារក ឫ កុមារ នៅមានដង្ហើមទេ?

សូមឆែករកមើលថា ទារក ឫ កុមារ នៅមានខ្យល់ដង្ហើមទេ? អ្នកអាចសង្កេតលើទ្រូងក្មេង ថាមានចលនាទេ រួចផ្ទៀងស្ដាប់ខ្យល់ដង្ហើម និងដាក់ថ្ពាល់អ្នកជិតមាត់ និងច្រមុះក្មេង ដើម្បីដឹងថា មានខ្យល់ប៉ះមុខអ្នកទេ។

បើមានខ្យល់ដង្ហើម តែក្មេងមិនដឹងខ្លួន សូមដាក់គេលើដៃអ្នក ដោយដាក់មុខគេអោនចុះក្រោម។

រង់ចាំរហូតឡានពេទ្យមកដល់។

ក្នុងករណីដែលក្មេង មិនដកដង្ហើម

សូមឆែកក្នុងមាត់របស់ក្មេង ករណីមានអ្វីរាំងស្ទះផ្លូវដង្ហើមគេ។

ករណី ក្មេងមិនដកដង្ហើម សូមដាក់ក្មេងលើផ្ទៃដែលរឹង មិនទ្រុឌចុះក្រោម ដោយដាក់គេឱ្យគេងផ្ងារ មុខបែរឡើងលើ។

យកម្រាមដៃរបស់អ្នក​ចំនួនពីរ ដាក់ត្រង់ចន្លោះសុដន់របស់គេ រួចរុញចុងម្រាមដៃចុះក្រោម​ ថ្មមៗ ចំនួន ៣០ដង (មួយវិនាទី រុញចុះក្រោមពីរដង)។

ស្រូបខ្យល់ឱ្យពេញមាត់អ្នក រួចដាក់បបូរមាត់របស់អ្នក លើមាត់ និងច្រមុះរបស់ក្មេង។ សូមផ្លុំខ្យល់ថ្នមៗ ចូលមាត់របស់ក្មេង (ផ្លុំម្ដង ក្នុងមួយវិនាទី)…បន្តធ្វើវាម្ដងទៀត

ប្រសិនបើទារក នៅតែមិនដកដង្ហើម សូមសាកល្បង រុញទ្រូងគេ ៣០ដងទៀត រួច ផ្លុំខ្យល់ ២ ដងទៀត រហូតដល់ទារកចាប់ផ្ដើមដកដង្ហើម ឫ រហូតដល់ក្រុមគ្រូពេទ្យជំនាញមកដល់។

សូមតាមដានមើលថា ទារក ឫ កុមារ មានខ្យល់ដង្ហើមមកវិញ ឫ ទេ។

ប្រភព៖raisingchildren.net.au