គន្លឹះទាំងនេះជួយកូនអ្នកសុខភាពល្អ និងជៀសឆ្ងាយពីជំងឺផ្សេងៗ

លោកប៉ាអ្នកម៉ាក់ឯណាមិនចង់ឱ្យកូនសុខភាពល្អ រឹងមាំ និងមានការលូតលាស់បានល្អ? ខាងក្រោមនេះជាគន្លឹះសំខាន់ៗសម្រាប់ជួយឱ្យកូនតូចៗមានសុខភាពល្អ និងកាត់បន្ថយពីការឆ្លងមេរោគផ្សេងៗ៖

ញ៉ាំអាហារឱ្យមានតុល្យភាព
- អាហារដែលមានតុល្យភាពសំដៅលើការទទួលបានអាហារូបត្ថម្ភគ្រប់គ្រាន់ និងត្រឹមត្រូវសម្រាប់ជួយឱ្យរាងកាយរឹងមាំ លូតលាស់បានល្អ និងបង្ការពីជំងឺផ្សេងៗ
- សម្រាប់កុមារ អាហារដែលមានតុល្យភាពជាអាហារដែលសម្បូរទៅដោយសារជាតិចិញ្ចឹមដូចជាគ្រាប់ធុញ្ញជាតិ អាហារសម្បូរប្រូតេអ៊ីន ផលិតផលទឹកដោះ ពពួកបន្លែនិងផ្លែឈើជាដើម។ អ្នកជំនាញណែនាំឱ្យកុមារញ៉ាំអាហារ និងអាហារសម្រន់ឱ្យបានប្រាំដងក្នុងមួយថ្ងៃដែលអាហារទាំងនោះ គួរជាប្រភេទអាហារដែលសម្បូរជីវជាតិ និងមានពណ៌ចម្រុះជាដើម៖
  - ស៊ុត៖ សម្បូរវីតាមីនសំខាន់ៗដូចជាវីតាមីន A, B12 ជាតិ Selenium និងជាតិស័ង្កសី។ ស៊ុតពោរពេញទៅដោយជាតិ Omega-3 ជាតិរ៉ែ ប្រូតេអ៊ីន និងសារជាតិប្រឆាំងអុកស៊ីតកម្ម។
  - សាច់និងត្រី៖ ជាប្រភពដ៏ល្អនៃជាតិស័ង្កសី ជាតិដែក និងវីតាមីនB។ ត្រីមួយចំនួនសម្បូរទៅដោយអាស៊ីតខ្លាញ់ដូចជាត្រីសាល់ម៉ុនផ្ដល់នូវជាតិ Omega-3 ក្នុងបរិមាណច្រើន ដែលជួយដល់ការលូតលាស់ខួរក្បាលនិងជួយឱ្យក្មេងមានសុខភាពល្អ
  - ពពួកបន្លែស្ពៃ៖ ស្ពៃក្តោប ស្ពៃពួយឡេង ស្ពៃប្រូខូលី ស្ពៃខាត់ណា សម្បូរទៅដោយសារជាតិដែលទៅជម្រុញប្រព័ន្ធការពាររាងកាយ។ ក្រៅពីនេះវាសម្បូរទៅដោយវីតាមីនក្រុម C, E & K និងជាតិរ៉ែសំខាន់ៗដទៃទៀត។ ពពួកបន្លែស្ពៃនេះក៏សម្បូរទៅដោយជាតិសរសៃដែលជួយឱ្យក្មេងបត់ជើងស្រួលដែរ
  - ផ្លែឈើ៖ ដូចជា ផ្លែក្រូច ទំពាំងបាយជូរ សម្បូរជីវជាតិជួយដល់ការជម្រុញប្រព័ន្ធការពាររាងកាយដែលជួយការពារនិងកាត់បន្ថយក្មេងពីជំងឺឆ្លងផ្សេងៗ
  - យ៉ាអ៊ួរ៖ យ៉ាអ៊ួរដែលមានបន្ថែមនូវប្រូបាយទិកជួយដល់ការលូតលាស់ប្រព័ន្ធរំលាយអាហារ និងជម្រុញប្រព័ន្ធការពាររាងកាយ
  - គ្រាប់ធញ្ញជាតិ៖ ដូចជាគ្រាប់ល្ងរ គ្រាប់ Chia គ្រាប់ល្ពៅ គ្រាប់ផ្កាឈូករ័ត្នជាដើម ដែលវាសម្បូរនូវពពួកជាតិសរសៃ omega-3 ជាតិខ្លាញ់ល្អៗ និងពពួកមីក្រូសារជាតិដែលជួយជម្រុញសុខភាពក្មេងឱ្យកាន់តែរឹងមាំ
  - ប៊ឺរី៖ ក្រេនប៊ីរី ប្លូប៊ីរី រ៉េបប៊ីរី ស្រ្តរប៊ីរី សម្បូរទៅដោយជីវជាតិ និងសារជាតិប្រឆាំងអុកស៊ីតកម្ម។ សារជាតិទាំងនេះទៅជួយជម្រុញប្រព័ន្ធការពាររាងកាយរបស់កុមារឱ្យមានសុខភាពល្អ។

ការគេងបានគ្រប់គ្រាន់

ការគេងបានគ្រប់គ្រាន់ជួយកាត់បន្ថយផលប៉ះពាល់លើប្រព័ន្ធការពាររាងកាយ និងជួយការពារក្មេងពីជំងឺឆ្លងផ្សេងៗ
ទារកគួរគេងឱ្យបាន ១២ ទៅ ១៦ម៉ោងក្នុងមួយថ្ងៃ និង ៨ ទៅ ១០ម៉ោងសម្រាប់កុមារវ័យជំទង់។

លំហាត់ប្រាណ

លំហាត់ប្រាណទៀងទាត់ ជួយឱ្យក្មេងមានសុខភាពល្អ និងកាត់បន្ថយជំងឺពីរ៉ាំរ៉ៃក្នុងវ័យកុមារភាព
កុមារតូចៗអាចរត់លេង ហែលទឹក ឫ ដើរកំសាន្តយ៉ាងហោច១ម៉ោងក្នុងមួយថ្ងៃ។

អនាម័យ

កង្វះអនាម័យអាចបង្កឱ្យក្មេងប្រឈមនឹងជំងឺឆ្លងដែលអាចនឹងធ្វើឱ្យប៉ះពាល់ដល់ការលូតលាស់របស់ក្មេង
រក្សាអនាម័យស្អាតទាំងលើរាងកាយក្មេង សម្ភារៈ និងបរិស្ថានជុំវិញក្មេង

ការគ្រប់គ្រងលើផ្លូវអារម្មណ៍របស់កុមារ

បច្ចុប្បន្នក្មេងងាយនឹងប្រឈមជំងឺស្រ្តេសដែលអាចធ្វើឱ្យប្រព័ន្ធការពាររាងកាយមានភាពទន់ខ្សោយ
អាណាព្យាបាលគួរបង្កើតសកម្មភាពកំសាន្តនានាដែលជួយឱ្យក្មេងៗមានអារម្មណ៍ល្អ និងរីករាយ
ក្នុងករណីអ្នកសង្កេតឃើញក្មេងមានបញ្ហាផ្លូវចិត្ត សូមនាំក្មេងទៅជួបពិគ្រោះជាមួយគ្រូពេទ្យជំនាញ។