អាចទេ! ចាក់វ៉ាក់សាំងរួច កូនពិបាកជុះជាងធម្មតា?

គ្មានភស្ដុតាង ឫ ឯកសារផ្លូវការណា បញ្ជាក់ថាការចាក់វ៉ាក់សាំងអាចធ្វើឱ្យទារកទល់លាមកនោះទេ។ វ៉ាក់សាំងត្រូវបានគេផលិតឡើងយ៉ាងយកចិត្តទុកដាក់ដោយមានការពិសោធន៍ច្បាស់លាស់ថាមានសុវត្ថិភាពគ្រប់គ្រាន់សម្រាប់ចាក់លើទារកនិងកុមារ ។

ការទល់លាមក​លើទារកនិងកុមារអាចបណ្ដាលមកពីកត្តាជាច្រើនដូចជា៖

• កត្តារបបអាហារ
• កង្វះជាតិទឹក
• លក្ខខណ្ឌសុខភាពមួយចំនួន (កង្វះអរម៉ូនទីរ៉ូអុីត)។

ករណីក្រោយចាក់វ៉ាក់សាំងរួច ទារកមានបម្រែបម្រួលលើការបត់ជើងដូចជាក្របត់ជើងជាងធម្មតា វាអាចបណ្ដាលមកពី៖

• មិនស្រួលខ្លួន៖ ក្រោយចាក់វ៉ាក់សាំងរួច ទារកអាចពិបាកក្នុងខ្លួនធ្វើឱ្យមិនមានផាសុកភាព (ស្ត្រេស) ដែលវិបត្តិនេះអាចប៉ះពាល់ដល់ប្រព័ន្ធរំលាយរបស់ទារក (បង្កឱ្យក្របត់ជើងជាងធម្មតា)
• ប៉ះពាល់ដល់ការបៅ៖ លែងសូវចង់បៅក្រោយចាក់វ៉ាក់សាំង ធ្វើឱ្យមិនសូវមានលាមកសម្រាប់បត់ជើង
• ក្ដៅខ្លួន៖ ក្ដៅខ្លួនអាចប៉ះពាល់ដល់ចលនាពោះវៀនដែលអាចធ្វើឱ្យទារកពិបាកបត់ជើង

ក្នុងករណីដែលទារកនិងកុមារមានអាការៈខុសប្រក្រតីក្រោយចាក់វ៉ាក់សាំង សូមប្រញាប់នាំទារកទៅជួបជាមួយគ្រូពេទ្យជំនាញជាបន្ទាន់។

ប្រភព៖www.cdc.gov