ពិតឫទេ! សញ្ញាណទាំងនេះបញ្ជាក់ថា កូនអាយុបានមួយសប្ដាហ៍ហើយ

បន្ទាប់ពីទារកកើតបានមួយសប្ដាហ៍ ទារកមានការផ្លាស់ប្ដូរលើ៖

ចលនារាងកាយ៖

• ចេះងើយក្បាលឡើងតិចៗ
• អាចផ្តោតលើវត្ថុអ្វីមួយ ដែលនៅចំងាយប្រហែល 20-38 cm (ចំងាយដែលគាត់មើលមុខយើង ពេលកំពុងលើកបីគាត់)
• ងាករកអ្វីមួយដែលប៉ះថ្ពាល់គេ ដូចជាចុងសុដន់ម្ដាយ ឫ ដបទឹកដោះគោ
• ចេះបង្ហាញសញ្ញា លើអ្វីដែលគេចូលចិត្ត និងមិនចូលចិត្ត (ភាសាទារក)

រូបរាងកាយ

• រាងកាយខុសប្លែកពីថ្ងៃទើបនឹងកើតដំបូងច្រើន
• ក្បាលទារកមានទំរង់មូលជាងមុន (ម្ដាយដែលសម្រាលកូនតាមធម្មជាតិ អាចធ្វើឱ្យក្បាលទារកមានរាងទ្រវែង)
• លែងសូវ ហើមមុខ និងភ្នែកដូចពេលទើបនឹងកើត
• ទំងន់រាងកាយចន្លោះពី 5kg ទៅ 4.5kg ព្រមទាំងមានប្រវែង​ 45cm ទៅ 55cm
• ទងផ្ចិតស្ងួត ប្ដូរជាពណ៌រាងក្រម៉ៅ និងធ្លាក់ចុះមកក្រៅ ក្នុងរយៈពេល 10​ ថ្ងៃដំបូង (សូមមានអនាម័យ លើទងសុកទារក និងរក្សាភាពស្ងួតជាប់ជានិច្ច ករណីមានឡើងក្រហម ស្អិត និងមានទឹករងៃ សូមនាំទារកទៅជួបពេទ្យជំនាញជាបន្ទាន់)

ការបៅ និងការគេង៖

• ទារកគេង16 ទៅ 18 ​ម៉ោងក្នុងមួយថ្ងៃ និង បៅរៀងរាល់ 2 ទៅ 4 ម៉ោងម្ដង (បៅ 8 ទៅ 12ដង ក្នុងមួយថ្ងៃ) ដែលការបំបៅម្ដងៗ អាចរហូតដល់មួយម៉ោង (ភាគច្រើនលើទារកបៅដោះម្ដាយ)

បញ្ហាផ្សេងៗ៖

• ស្រកទំងន់: (ស្រកទំងន់ប្រមាណជា 10% នៃទំងន់សរុបពេលកើត) ការស្រកទំងន់នេះ បង្កមកពីការបាត់បង់សារធាតុរាវមួយចំនួនក្នុងរាងកាយទារក។ ទារកនឹងចាប់ផ្ដើុមឡើងទំងន់វិញ ក្រោយកើតមួយសប្ដាហ៍។
• សុខភាពភ្នែក: មួយ ទៅ ពីរសប្ដាហ៍ដំបូង ភ្នែកទារកឡើងស្អិត និងមានជាតិស្អិតៗច្រើនជុំវិញភ្នែក ដែលវាអាចបង្កដោយការស្ទះរន្ធទឹកភ្នែករបស់ទារក។ បញ្ហានេះ នឹងបាត់ទៅវិញនៅប៉ុន្មានសប្ដាហ៍ក្រោយ ម៉ាក់ប៉ាអាចសំអាតភ្នែកទារកជាមួយនឹងទឹកក្ដៅអុណ្ឌៗ ឫ សេរ៉ូមប្រៃ និងម៉ាស្សាថ្នមៗដើម្បីកាត់បន្ថយអាការៈនេះ។
• កន្ទួលក្រហម ឫ រោល: ទារកតូចៗងាយជួបប្រទះនឹងបញ្ហា រមាស់ និងការរោលលើស្បែកនេះណាស់ តែជាទូទៅវាមិនមានអាការៈធ្ងន់ធ្ងរទេ។ ការរោលលើស្បែកនេះ រួមមានទាំង ចែងថ្ងៃ ក្រម៉រលើស្បែកក្បាល រោល និងស្បែកស្ងួត។
• សូមរក្សាអនាម័យឱ្យបានត្រឹមត្រូវ និងមានភាពស្ងួតជាប្រចាំនៅជុំវិញរាងកាយទារក ព្រមទាំងអាចប្រើប្រាស់ឡេការពារកន្ទួលរមាស់លើក្មេងជាប្រចាំ (nappy rash cream)។

ប្រភព៖raisingchildren.net.au