ផលប៉ះពាល់នៃស្ករសិប្បនិម្មិត (Added sugar) ដែលស្រ្តីគួរស្វែងយល់

ស្ករ (Sugar or simple carbohydrate) ជាប្រភពនៃថាមពលដល់រាងកាយអ្នកប្រើប្រាស់។

ស្ករចែកចេញជាពីរប្រភេទធំៗ៖

1. ស្ករធម្មជាតិ (Natural sugar) ជាប្រភេទស្ករដែលសម្បូរក្នុងអាហារធម្មជាតិដូចជាពពួកបន្លែ ផ្លែឈើ ផលិតផលទឹកដោះ និងគ្រាប់ធញ្ញជាតិ។ ហ្វ្រាក់តូស​ (Fructose) ជាប្រភេទស្ករធម្មជាតិមួយប្រភេទដែលសម្បូរក្នុងផ្លែឈើ។ ស្ករឡាក់តូស (Lactose) ជាស្ករធម្មជាតិដែលសម្បូរក្នុងផលិតផលទឹកដោះ (Dairy products) ។
2. ស្ករសិប្បនិម្មិត ឫ ស្ករកែច្នៃ (Added sugar) ជាប្រភេទស្ករដែលសម្បូរក្នុងអាហារ និងភេសជ្ជៈកែច្នៃ (processed foods and drinks)។

ស្ករប្រភេទនេះ ភាគច្រើនមិនសូវជំនួយសុខភាពទេ។ គេនិយមប្រើសម្រាប់៖

• ជួយបង្កើនរសជាតិ ពណ៌ ទ្រង់ទ្រាយអាហារ និងភេសជ្ជៈ
• ដើម្បីរក្សានំដុតឱ្យរក្សាទុកបានយូរ
• ជួយរក្សាគុណភាពស្ករចាហួយ និងដំណាប់ពីការខូចគុណភាព
• ជួយឱ្យនំប័ុង និងអាល់កុលឡើងមេបានល្អ ។

ខាងក្រោមនេះជាប្រភេទអាហារដែលមានបន្ថែមស្ករសិប្បនិម្មិត ដូចជា៖

• ស្ករគ្រាប់
• នំខេក
• នំខូគី
• ការ៉េម និងយ៉ាអួរ
• ភេសជ្ជៈប៉ូវកម្លាំង ភេសជ្ជៈកំប៉ុង ភេសជ្ជៈសម្រាប់អ្នកហាត់កីឡា និងទឹកផ្លែឈើកំប៉ុងមួយចំនួន។

ប្រសិនជាអ្នកផឹក ឫ ញ៉ាំអាហារដែលសម្បូរជាតិស្ករសិប្បនិម្មិត (Added sugar)  ច្រើន វាអាចប៉ះពាល់ដល់សុខភាពដូចជា៖

• ពុកធ្មេញ ឫ ដង្កូវស៊ីធ្មេញ
• ធាត់
• មានជំងឺទឹកនោមផ្អែមប្រភេទទី២
• មានជំងឺបេះដូង
• កើនឡើងនៃទ្រីគ្លីសេរីត (ខ្លាញ់អាក្រក់ក្នុងរាងកាយ)
• បង្កើនបរិមាណខ្លាញ់អាក្រក់ ( High LDL )
• បន្ថយបរិមាណខ្លាញ់ល្អក្នុងរាងកាយ (Decreased HDL ) ។

ស្រ្តីដែលញ៉ាំអាហារ ឫ ភេសជ្ជៈសម្បូរជាតិស្ករសិប្បនិម្មិតច្រើនអាចធ្វើឱ្យស្រ្តីមិនសូវចង់ញ៉ាំអាហារដែលជំនួយសុខភាព។

ពិតណាស់! មានវិធីសាស្រ្តជាច្រើនដែលស្រ្តីអាចកំណត់ ឫ បញ្ចៀសជាតិស្ករមិនល្អក្នុងរបបអាហារ៖

• ញ៉ាំបន្លែ ផ្លែឈើ ប្រូតេអុីន និងគ្រាប់ធញ្ញជាតិ
• កាត់បន្ថយការញ៉ាំស្ករគ្រាប់ ពពួកនំ-នំប័ុង ការ៉េម…
• ញ៉ាំទឹកជំនួសឱ្យការញ៉ាំភេសជ្ជៈប៉ូូវកម្លាំង ឫ ភេសជ្ជៈកំប៉ុង
• កាត់បន្ថយអាហារកែច្នៃ (កែច្នៃភាគច្រើនសម្បូរស្ករសិប្បនិម្មិត និងសូដ្យូម)

អានលើ Label ថាក្នុងផលិតផលនោះមានជាតិស្ករបន្ថែមច្រើនទេ​។ ១ក្រាមនៃជាតិស្ករស្មើរនឹង៤កាល់ឡូរី និង ១ស្លាបព្រាកាហ្វេស្មើរនឹងស្ករប្រមាណ៤ក្រាម។ ឧ. ប្រសិនជាលើ Label  បញ្ជាក់ថាមានស្ករ ៤០ក្រាម នោះអ្នកនឹងទទួលបានកាល់ឡូរីរហូតដល់១៦០ ឫ ស្ករក្នុងបរិមាណ១០ស្លាបព្រាកាហ្វេ​។ ដូចនេះហើយ អ្នកគួរជ្រើសរើសជាតិស្ករ (sugar) តិចជាង៥%បានហើយ។ អ្នកគួរជៀសវាងអាហារដែលមានជាតិស្ករលើសពី២០% ។

ស្ករសិប្បនិម្មិតអាចមានឈ្មោះដទៃទៀតដូចជា៖

• ស៊ីរ៉ូ (Syrup)
• ស្ករត្នោត (Brown sugar)
• ទឹកឃ្មុំ (Honey)
• ស្កររងូរ (Molasses)
• ស្ករដិចស្ដុស (Dextrose)
• ស្ករហ្វ្រាក់តូស (Fructose)
• ស្ករគ្លុយកូស (Glucose)
• សូចក្រូស (Sucrose) ។

ប្រភព៖familydoctor.orgbyjus.com