ចេះតែចុកឆ្អល់ពេលមានផ្ទៃពោះ!!! តើគួរធ្វើដូចម្ដេច?

ស្ត្រីតែងចាប់ផ្ដើមមានការចុកឆ្អល់ចុងដង្ហើមនៅត្រីមាសទីពីរនៃការមានផ្ទៃពោះហើយកាន់តែខ្លាំងឡើងនៅពេលផ្ទៃពោះកាន់តែចាស់ខែ។ តើវាបណ្ដាលមកពីអ្វី? អាចធ្វើអោយធូរស្បើយបានទេ?

ការកើនឡើងកម្រិតអរម៉ូន Progesterone បណ្ដាលសាច់ដុំករក្រពះបិតមិនជិតដែលជាហេតុធ្វើអោយអាស៊ីតច្រាលពីក្រពះមកផ្លូវអាហារ និងធ្វើអោយមានអាការក្ដៅ និងក្រហាយ។ ម៉្យាងទៀត ការសង្កត់ទម្ងន់របស់ទារកនៅពេលពោះកាន់តែចាស់ខែក៏ជាមូលហេតុបណ្ដាលអោយមានការចុកឆ្អល់ចុងដង្ហើមដែរ។ មានវិធីសាស្ត្រ ៥យ៉ាងជួយស្ត្រីក្នុងការកាត់បន្ថយអាការចុកឆ្អល់ចុងដង្ហើម

ញ៉ាំអាហារតិច តែញឹកញាប់

ការញ៉ាំអាហារឆ្អែតពេកធ្វើអោយស្ត្រីមានអាការចុកឆ្អល់ចុងដង្ហើម។ ក្រពះរបស់ស្ត្រីមានផ្ទៃពោះមិនមានកន្លែងគ្រប់គ្រាន់ក្នុងការរីកដូចមនុស្សធម្មតានោះទេ។ ការញ៉ាំអាហារតិចៗតែច្រើនដងគឺជួយអោយស្ត្រីជៀសផុតពីបញ្ហានេះពេញ ៩ខែ ១០ថ្ងៃនៃការមានផ្ទៃពោះ។ ការញ៉ាំអាហារម្ដងបន្តិចៗជួយអោយប្រព័ន្ធរំលាយអាហារមានពេលវេលាក្នុងការរំលាយអាហារបានល្អ និងកាត់បន្ថយការចុកឆ្អល់ចុងដង្ហើមក្នុងពេលមានផ្ទៃពោះ។

ជៀសវាងអាហារមួយចំនួន

ផ្លែក្រូច ប៉េងប៉ោះ អាហារចៀន អាហារហឹរ សូកូឡា កាហ្វេ ភេសជ្ជៈប៉ូវកម្លាំង និងគ្រឿងស្រវឹងសុទ្ធតែបង្កើនការបញ្ចេញអាស៊ីតក្នុងក្រពះ។ ហេតុនេះប្រសិនជាស្ត្រីមានបញ្ហាចុកឆ្អល់មិនគួរញ៉ាំអាហារទាំងនោះទេ។

ទឹក

ការញ៉ាំអាហារមានជាតិទឹកគឺពុំសូវមានបញ្ហាបញ្ហាចុកឆ្អល់ក្រពះនោះទេព្រមទាំងជួយរំលាយអាហារទៀតផង។ ស៊ុប យាអ៊ួ ទឹកផ្លែឈើក្រឡុក ទឹកដោះគោគឺជាអាហារដែល្អចំពោះស្ត្រីមានផ្ទៃពោះ និងងាយស្រួលរំលាយ។ ការញ៉ាំអាហាររឹងផ្សេងទៀត ស្ត្រីគួរទំពារអោយបានហ្មត់មុនលេប និងមិនគួរប្រញាប់ពេកនោះទេ។

ការគេង

ដើម្បីជៀសវាងការចុកឆ្អល់ដង្ហើមនៅពេលយប់ ស្ត្រីមិនគួរញ៉ាំអាហារ ៣ម៉ោងមុនចូលគេងនោះទេ។ ស្ត្រីគួរប្រើខ្នើយកើយក្បាលដើម្បីជៀសវាងការច្រាលអាស៊ីតពីក្រពះទៅបំពង់អាហារ។ ដូចគ្នានេះដែរ ស្ត្រីគួរគេងបែងមកខាងឆ្វេង និងមិនគួរផ្ដេកខ្លួន ឬទម្រេតនៅពេលទើបញ៉ាំអាហាររួចនោះទេ។

ស្ត្រីគួរប្រឹក្សាជាមួយគ្រូពេទ្យនៅពេលមានចម្ងល់អំពីបញ្ហាទាំងនេះ។ សូមចាំថា ការចុកឆ្អល់ចុងដង្ហើមមិនបង្កអោយមានផលប៉ះពាល់ដល់ទារកក្នុងផ្ទៃទេ វាគ្រាន់តែផ្នែកមួយនៃផលរំខានក្នុងពេលមានផ្ទៃពោះ។

ប្រភព៖kidshealth.orgparents.com