ចូលបន្ទប់ទឹកញឹកពេលមានផ្ទៃពោះបណ្ដាលមកពីអ្វី

ការមានផ្ទៃពោះតែងមានសញ្ញារំខានជាច្រើនដល់ស្ត្រី ក្នុងចំណោមនោះការនោមញឹកជារឿងមួយដែលគួរអោយធុញទ្រាន់បំផុតចំពោះស្ត្រី។ ស្ត្រីអាចជួបប្រទះបញ្ហានេះនៅសប្ដាហ៍ទី ៦នៃការមានផ្ទៃពោះ។ បងប្អូនស្ត្រីមួយចំនួនលេចនោមនៅពេលក្អក កណ្ដាស់ ឬសើចកក៏មានដែរ។ តើវាបណ្ដាលមកពីអ្វី? តើស្ត្រីអាចកាត់បន្ថយការនោមញឹកនេះបានទេ?

វាមានកត្តាជាច្រើនដែលនាំអោយមានការនោមញឹកបែបនេះ។ ក្នុងនោះមានអរម៉ូន hCG ការកើនឡើងបរិមាណឈាម និងការសង្កត់នៃស្បូនទៅលើផ្លោកនោមដែលធ្វើអោយផ្លោកនោមស្តុកទឹកនោមបានក្នុងបរិមាណតិច ហើយក៏ត្រូវបញ្ចេញចោលញឹកញាប់។

ក៏ដូចជាផលរំខាននានាក្នុងពេលមានផ្ទៃពោះផ្សេងទៀតដែរគឺស្ត្រីពុំអាចជៀសផុតបានទេ តែស្ត្រីអាចកាត់បន្ថយបញ្ហានេះតាមរយៈ

• កុំទទួលទានកាហ្វេ ឬភេសជ្ជៈទាំងឡាយដែលមានជាតិកាហ្វេអ៊ីន។ ជាតិកាហ្វេអ៊ីនបង្កើនការបញ្ចេញទឹកនោម និងធ្វើអោយអ្នកនោមញឹក។
• កុំញ៉ាំទឹកមុនចូលគេង ប្រសិនបើអ្នកសង្កេតខ្លួនឯងថា អ្នកតែងនោមញឹកនៅពេលយប់។ ដូចនេះគួរកាត់បន្ថយការញ៉ាំទឹកមុនចូលគេង។
• ស្ត្រីគួរទៅបន្ទប់ទឹកមុនពេលឈឺនោម ដើម្បីបង្កាការលេចនោមដោយមិនដឹងខ្លួន

ស្ត្រីមិនគួរយល់ច្រលំថា ការមិនសូវញ៉ាំទឹក ឬញ៉ាំទឹកតិចគឺអាចកាត់បន្ថយការនោមនោះទេ។ ស្ត្រីនៅតែត្រូវការជាតិទឹកដើម្បីផ្គត់ផ្គងរាងកាយ និងការលូតលាស់កូនក្នុងផ្ទៃ។

បញ្ហានោមញឹកមិនបង្កអោយមានគ្រោះថ្នាក់នោះទេ។ ម៉្យាងទៀត ស្ត្រីមិនគួរទប់មិនបញ្ចេញទឹកនោមទេ។ ការទប់នោមបណ្ដាលអោយស្ត្រីប្រឈមនឹងបញ្ហារលាកបង្ហូរនោម។ ស្ត្រីអាចជួបជាមួយគ្រូពេទ្យ ប្រសិនជាការនោមរបស់ស្ត្រីមានលាយឈាម ក្រហាយពេលនោម ឬនោមមានខ្ទុះ។

ប្រភព៖pampers.comtodaysparent.com