កាល់ស្យូមសំខាន់យ៉ាងណាចំពោះស្ត្រីមានផ្ទៃពោះ

ក្នុងពេលមានផ្ទៃពោះ ទារកក្នុងផ្ទៃត្រូវការជាតិកាល់ស្យូមដើម្បីការលូតលាស់ឆ្អឹង និងធ្មេញបានល្អ។ ចំពោះម្ដាយ វាក៏ជួយក្នុងការផលិតទឹកដោះ ពង្រឹងមុខងារសរសៃប្រសាទ និងសាច់ដុំហើយថែមទាំងជួយរក្សាចង្វាក់បេះដូងឱ្យបានល្អ និងចូលរួមក្នុងកំណកឈាម។

ការទទួលបានកាល់ស្យូមគ្រប់គ្រាន់ពិតជាមានសារៈសំខាន់ណាស់ពិសេសនៅត្រីមាសចុងក្រោយនៃការមានផ្ទៃពោះ។

តើស្ត្រីមានផ្ទៃពោះគួរទទួលទានក្នុងកម្រិតប៉ុន្មាន?

តម្រូវការជាប្រចាំថ្ងៃគឺប្រែប្រួលទៅតាមអាយុរបស់ស្ត្រីមានគក៌។

សម្រាប់ស្ត្រីមានផ្ទៃពោះ និងបំបៅដោះកូនដែលមាន៖

អាយុ ១៩ ទៅ៥០ឆ្នាំ គឺត្រូវការ ១០០០ មីលីក្រាមក្នុងមួយថ្ងៃ
អាយុក្រោម ១៨ឆ្នាំ គឺត្រូវការ ១៣០០ មីលីក្រាមក្នុងមួយថ្ងៃ

ទោះបីជាស្ត្រីសម្រាលកូនរួចក្ដី ក៏ស្ត្រីគួរទទួលទានកាល់ស្យូមឱ្យបានគ្រប់គ្រាន់ដែរ ដើម្បីបង្ការការស្ពោតឆ្អឹងនៅពេលអនាគត។

តើស្ត្រីគួរញ៉ាំកាល់ស្យូមបន្ថែមដែរឬទេ ក្នុងពេលមានផ្ទៃពោះ?

វីតាមីនសម្រាប់ស្ត្រីមានផ្ទៃពោះភាគច្រើនមានកាល់ស្យូមត្រឹម ១០០ ទៅ ២០០មីលីក្រាមប៉ុណ្ណោះ។ ស្ត្រីគួរជ្រើសរើសផលិតផលណាដែលមានកាល់ស្យូម និងវីតាមីន D រួមបញ្ចូលគ្នា។ វីតាមីន D ជួយអោយកាល់ស្យូមស្រូបចូលក្នុងរាងកាយបានល្អ។ កាល់ស្យូមមានច្រើនទម្រង់ក្នុងនោះមានកាល់ស្យូមកាបូណាតគឺទាមទារអោយមានជាតិអាស៊ីតពីក្រពះច្រើនដើម្បីជួយរំលាយដើម្បីស្រូបចូលរាងកាយបានល្អ ហេតុនេះស្ត្រីគួរញ៉ាំក្រោយអាហារ។

ចំពោះ កាល់ស្យូមស៊ីត្រាតគឺងាយស្រូបចូលក្នុងរាងកាយដោយពុំត្រូវការអាស៊ីតក្រពះច្រើនក្នុងការរំលាយទេ។

នៅពេលស្ត្រីញ៉ាំថ្នាំគ្រាប់ជាតិដែក និងជាតិកាល់ស្យូមគឺមិនគួរញ៉ាំស្របពេលគ្នានោះទេ គឺគួររក្សាគម្លាត ១ ទៅ ២ម៉ោងពីគ្នា។

ការប្រើប្រាស់កាល់ស្យូមលើសកម្រិតបណ្ដាលឱ្យមានគ្រួសក្នុងតម្រងនោម។ ហេតុនេះស្ត្រីគួរពិគ្រោះជាមួយគ្រូពេទ្យជំនាញដើម្បីដឹងពីតម្រូវការជាតិរ៉ែក្នុងរាងកាយ។

ប្រភពអាហារមានជាតិកាល់ស្យូមមាន៖

អាហារ	បរិមាណ	ជាតិកាល់ស្យូម(mg)
យ៉ាអ៊ួរមានជាតិខ្លាញ់ទាប	250ml	415
ទឹកដោះគោគ្មានជាតិខ្លាញ់	250ml	299
ទឹកដោះគោមានជាតិខ្លាញ់២%	250ml	293
ទឹកដោះគោមានជាតិខ្លាញ់ទាប	250ml	284
ទឹកដោះគោមានជាតិខ្លាញ់ខ្ពស់ (3.25%)	250ml	276
ត្រីសាល់ម៉ុន	85g	181
គ្រាប់ Chia	15mg	76
ប្រូខូលី	45g	21